Job 38

Sehemu Ya Nne: Mungu Anazungumza

(Ayubu 38–41)

Bwana Anamjibu Ayubu

1 ^aKisha Bwana akamjibu Ayubu kutoka upepo wa kisulisuli. Akasema:
2 ^b“Nani huyu atiaye mashauri yangu giza
kwa maneno yasiyo na maarifa?

3 ^cJikaze kama mwanaume;
nitakuuliza swali,
nawe unijibu.

4 ^d“Ulikuwa wapi nilipoweka misingi ya dunia?
Niambie, kama unafahamu.

5 ^eNi nani aliyeweka alama vipimo vyake?
Hakika wewe unajua!
Ni nani aliyenyoosha kamba ya kupimia juu yake?

6 ^fJe, misingi yake iliwekwa juu ya nini,
au ni nani aliyeweka jiwe la pembeni,

7 ^gwakati nyota za asubuhi zilipoimba pamoja,
na malaika wote walipokuwa wakipiga kelele kwa furaha?

8 ^h“Ni nani aliyeifungia bahari milango
ilipopasuka kutoka tumbo,

9 ⁱnilipoyafanya mawingu kuwa vazi lake,
na kuyafungia katika giza nene,

10 ^jnilipoamuru mipaka yake,
na kuiweka milango yake na makomeo mahali pake,

11 ^kniliposema, ‘Unaweza kufika mpaka hapa wala si zaidi;
hapa ndipo mawimbi yako yenye kiburi yatakapokomea’?

12 ^l“Umepata kuiamrisha asubuhi ipambazuke,
au kuyaonyesha mapambazuko mahali pake,

13 yapate kushika miisho ya dunia,
na kuwakung’uta waovu waliomo?

14 ^mDunia hubadilika kama udongo wa mfinyanzi chini ya lakiri;
sura yake hukaa kama ile ya vazi.

15 ⁿWaovu huzuiliwa nuru yao,
nao mkono wao ulioinuliwa huvunjwa.

16 ^o“Je, umepata kufika kwenye chemchemi za bahari?
Au kutembea mahali pa ndani pa vilindi?

17 ^pUmewahi kuonyeshwa malango ya mauti?
Umewahi kuiona milango ya uvuli wa mauti?

18 ^qJe, wewe unafahamu ukubwa wa dunia?
Niambie kama unajua haya yote.

19 ^r“Njia ya kufika kwenye makao ya nuru ni ipi?
Nako maskani mwa giza ni wapi?

20 ^sJe, unaweza kuvirudisha kwenye makao yake?
Unajua njia za kufika maskani mwake?

21 ^tHakika unajua, kwa kuwa ulikuwa umeshazaliwa!
Kwani umeishi miaka mingi!

22 ^u“Je, umeshawahi kuingia katika ghala za theluji,
au kuona ghala za mvua ya mawe,

23 ^vambazo nimeziweka akiba kwa ajili ya wakati wa taabu,
na kwa ajili ya wakati wa vita na mapigano?

24 ^wNi ipi njia iendayo mahali umeme wa radi unapotawanyiwa,
au mahali upepo wa mashariki unaposambaziwa juu ya dunia?

25 ^xNi nani aliyepasua mifereji kwa ajili ya maji mengi ya mvua yaendayo kasi
na njia ya umeme wa radi,

26 ^yili kusababisha mvua kunyeshea mahali pasipokaliwa na mtu,
jangwa lisilo na yeyote ndani yake,

27 ^zili kuitosheleza nchi ya ukiwa na jangwa,
na majani yaanze kumea ndani yake?

28 ^aaJe, mvua ina baba?
Ni nani baba azaaye matone ya umande?

29 ^abBarafu inatoka tumbo la nani?
Ni nani azaaye ukungu kutoka mbinguni,

30 ^acwakati maji yawapo magumu kama jiwe,
wakati uso wa vilindi vya maji unapoganda?

31 ^ad“Je, waweza kuufunga mnyororo wa Kilimia?
Waweza kulegeza kamba za Orioni?

32 ^aeWaweza kuyaongoza makundi ya nyota kwa majira yake,
au kuongoza Dubu na watoto wake?

33 ^afJe, unajua sheria zinazotawala mbingu?
Waweza kuweka utawala wa Mungu duniani?

34 ^ag“Waweza kuiinua sauti yako mpaka mawinguni,
na kujifunika mwenyewe na gharika ya maji?

35 ^ahJe, wewe hutuma umeme wa radi kwenye njia zake?
Je, hutoa taarifa kwako kukuambia, ‘Sisi tuko hapa’?

36 ^aiNi nani aliyeujalia moyo hekima
au kuzipa akili ufahamu?

37 ^ajNani mwenye hekima ya kuyahesabu mawingu?
Ni nani awezaye kuinamisha magudulia ya mbinguni

38 ^akwakati mavumbi yawapo magumu,
na mabonge ya udongo kushikamana pamoja?

39 ^al“Je, utamwindia simba jike mawindo,
na kuwashibisha simba wenye njaa

40 ^amwakati wao wamejikunyata mapangoni mwao,
au wakivizia kichakani?

41 ^anNi nani ampaye kunguru chakula
wakati makinda yake yanamlilia Mungu,
yakizungukazunguka kwa ajili ya kukosa chakula?